अर्थमन्त्रीको अभिव्यक्तिप्रति वर्षमान पुनको आपत्ति, छानबिनको माग

नेपाली कम्युनिस्ट पार्टी (नेकपा)ले आगामी आर्थिक वर्षको बजेट अर्थ मन्त्रालयबाट चुहावट भएको आरोप लगाउँदै अर्थमन्त्री स्वर्णिम वाग्लेमाथि छानबिन गर्न संसदीय समिति गठनको माग गरेको छ। शुक्रबार प्रतिनिधिसभाको बैठकमा बोल्दै पूर्वअर्थमन्त्री तथा नेकपाका सांसद वर्षमान पुनले बजेट निर्माण प्रक्रियामा अनियमितता भएको आशंका व्यक्त गर्दै निष्पक्ष छानबिन आवश्यक रहेको बताए। उनले अर्थमन्त्री वाग्लेले पुराना फाइल खोल्ने अभिव्यक्ति दिएको उल्लेख गर्दै आफू अर्थमन्त्री भएको समयदेखिका सबै फाइल खोल्न चुनौती दिए। कुनै पनि विषयमा तथ्य र प्रमाणका आधारमा अनुसन्धान हुनुपर्ने उनको भनाइ थियो। सांसद पुनले पुराना काण्डका फाइल खोल्ने भन्दै धम्कीपूर्ण शैलीमा अभिव्यक्ति दिनु आपत्तिजनक भएको बताए। उनले बजेट चुहावट सम्बन्धी विषयको सत्यतथ्य बाहिर ल्याउन संसदीय छानबिन समिति गठन गरी निष्पक्ष अनुसन्धान गर्न सरकारसँग माग गरे।